Rom 16 | NdeIBE | STEP | Ngimethula kini udadewethu uFebhi, isikhonzikazi sebandla eKhenikhireya.

Romans 16

Ukubingelela Kwakhe

1 Ngimethula kini udadewethu uFebhi, isikhonzikazi sebandla eKhenikhireya.

2 Ngiyalicela ukuba limamukele eNkosini ngendlela efanele abangcwele njalo limsize ngakho konke angakuswela kini, ngoba laye ubelosizo olukhulu ebantwini abanengi, lakimi.

3 Bingelelani uPrisila lo-Akhwila, abayizisebenzi kanye lami kuKhristu uJesu. 4 Babeka impilo yabo engozini ngenxa yami. Akusimi kuphela kodwa wonke amabandla abezizwe ayababonga kakhulu.

5 Bingelelani lebandla elihlanganela endlini yabo. Bingelelani umngane wami othandekayo u-Ephenethusi, owaba ngowokuqala ukuphendukela kuKhristu esiqintini sase-Asiya.

6 Bingelelani uMariya owalisebenzela kanzima.

7 Bingelelani u-Andironikhu loJuniyasi, izihlobo zami ezazisentolongweni kanye lami. Badumile phakathi kwabaphostoli, njalo babekuKhristu mina ngingakabi khona.

8 Bingelelani u-Ampiliyathu, engimthandayo eNkosini.

9 Bingelelani u-Abhanusi, oyisisebenzi kanye lathi kuKhristu, lomngane wami othandekayo uStakhisi.

10 Bingelelani u-Aphele, owahlolwayo wamukelwa kuKhristu. Bingelelani labo abangabendlu ka-Aristobhulu.

11 Bingelelani uHerodiyoni, isihlobo sami. Bingelelani labo abasemzini kaNakhisu abaseNkosini.

12 Bingelelani uTrifayena loTrifosa, abesifazana labo abasebenza kakhulu eNkosini. Bingelelani umngane wami othandekayo, uPhesisi, omunye owesifazana osesebenze kakhulukazi eNkosini.

13 Bingelelani uRufusi, okhethiweyo eNkosini, lonina, obengumama lakimi.

14 Bingelelani u-Asinkiritu, loFilegoni, loHemesi, loPhathirobha, loHemasi kanye labazalwane abalabo.

15 Bingelelani uFilologu, loJuliya, loNerusi lodadewabo, kanye lo-Olimpasi labo bonke abangcwele abalabo.

16 Bingelelanani ngokwangana okungcwele. Wonke amabandla kaKhristu ayalibingelela.

17 Ngiyalincenga, bazalwane, ukuba libaqaphele labo abadala ukwahlukana bebeka izivimbelo endleleni yenu, okuphambene lemfundiso elayifundayo. Baxwayeni. 18 Ngoba abantu abanjalo kabakhonzi Nkosi yethu uKhristu, kodwa izinkanuko zabo. Ngenkulumo emnandi langobuqili bakhohlisa izingqondo zabantu abayiziphukuphuku. 19 Abantu bonke sebezwile ngokulalela kwenu, ngakho ngilokuthokoza okukhulu ngani; kodwa ngifuna ukuba lihlakaniphele okuhle, njalo libe msulwa kokubi.

20 UNkulunkulu wokuthula uzamchoboza masinyane uSathane ngaphansi kwezinyawo zenu. Umusa weNkosi yethu uJesu kawube lani.

21 UThimothi, engisebenza laye, uyalibingelela, loLukhiyu, loJasoni kanye loSosiphatheri, izihlobo zami.

22 Mina Thethiyu, engilobe incwadi le, ngiyalibingelela eNkosini.

23 UGayiyu, osiphatho sakhe esihle siyangijabulisa mina kanye lebandla lonke lapha, uyalibingelela.

24 Sengathi umusa weNkosi yethu uJesu Khristu ungaba lani lonke. U-Erastu, ongumqondisi wemisebenzi yabantu bonke wedolobho, lomzalwane wethu uKhwathu bayalibingelela.

25 Kuye olamandla okuliqinisa ngevangeli lami langentshumayelo kaJesu Khristu, mayelana lokwambulwa kwemfihlakalo eyayifihlakele okweminyakanyaka eyedlulayo,

26 kodwa khathesi yambulwe yaziswa ngemibhalo yabaphrofethi ngokulaya kukaNkulunkulu waphakade, ukuze izizwe zonke zikholwe zimlalele – 27 kuNkulunkulu onguye yedwa olenhlakanipho akube lenkazimulo nini lanini ngoJesu Khristu! Ameni.